1. ¿ que destacarías de la cultura asturiana que tú defiendes ?

» Pa mi la cultura asturiana ye daqué mui plural y nun ye namás lo tradicional, tamién la hai contemporánea y actual. Por supuestu lo más relevante d´ella ye la llingua, una creación fecha a lo llargo de los sieglos pero que tien vixencia anguañio, paezme que ye la meyor síntesis de lo que dixe enantes.

2. Xune , la xente ta resigná y acomdá , ¿crees que si no se cambia esta postura no hay na que facer?

» La xente, sobretoo equí n´Asturies, lleva munchos años resignao. La desmovilización de les clases populares ye daqué de lo peor que padecemos nesti país. De toes maneres tamién creo que tán produciéndose dellos fechos que puen suponer un cambiu nesta situación.

3. Teneis previstu dalgun conciertu en Cataluña esti añu? Tamos naguando por vevos…

» Nesti momentu tamos preparando la xira d´esti añu y sí que nos prestaría dir a Catalunya, con un poco de suerte probablemente teamos per ehí.

4. ¿ te sigues considerando admirador de los Clash y algo Punk ?

» Los Clash significaron abondo na mio formación como músicu y creo que les sos propuestes, musicales y ideolóxiques, siguen siendo actuales dafechu. En cuabtes al punk en xeneral marcó la mio manera d´entender muches coses y sigo teniéndolu como un referente.

5. Facéis gala de un batulax punk-rockero-asturtxale- jazzísticu y folkie etnicista astur y célticu, ¿ ye que el únicu futuru d´Asturies ta nel mestizaxe?

» El mestizaxe ye ún de los elementos fubndamentales pa entender la sociedá de güei, nada escapa a él, y la música nun diba ser menos.

6. denunciaste alguna vez que" los asturianos tamos reprimíos y faen por exteminanos como a indios " ¿ crees que la política cultural asturiana y estatal ta por el exterminiu de los asturianos ?

» De mano abúltame que nun hubo una política cultural definida y clara por parte de nengún de los gobiernos autonómicos que´l país tuvo hasta agora. La nuestra cultura ta tratada como daqué marxinal y tiéndese a folclorizala.

7. ¿ crees que Asturies ye una nación ?

» Asturies tien toles característiques propies d´una nación, asina que nesi sentíu sí que creo ye una nación. Otra manera, falta daqué mui importante pa que seya una nación completa: que´l pueblu asturianu adquiera precisamente una conciencia nacional, ensin ello nun hai nada que facer.

8. ¿ que te paecen programes como "Camín de cantares " de TPA ?

» Ambás ye una de les grandes xoyes que tenemos n´Asturies, el so llabor como baluarte de la cultura oral del país ye incuestionable, amás ye un gran comunicador y la TPA debería tar encantada de tenelu nella.

9. Xune, ¿ qué te paecen les eleiciones anticipaes de Cascos n´Asturies ?

» Creo que ye la prueba del so fracasu políticu n´Asturies, prometió too y más y nun foi quien a entendese colos demás pa que lu dexaren gobernar. Too ello nuna situación como la que carecemos anguaño de crisis xeneralizada. De toes maneres paezme una verdadera irresponsabilidá por parte de tolos políticos que tán na Xunta Xeneral, miraron más pol so interés partidista que pol xeneral de los y les ciudadanes asturianos.

10. Hola Xune. Enhorabuena por vuestra historia y vuestra trayectoria. ¿Nunca os planteásteis cantar alguna canción en castellano?

» Pues la verdá que non. Dixebra nació col oxetivu de cantar n´asturianu y siguimos calteniéndolu. Pa nós ye daqué fundamental.

11. ¿ Asturies o trabayes ? ¿ qué te paez el 5o% de paro xuvenil y la emigración masiva de la mocedá de la nuestra tierrina ?

» Eso que comentes ye un fechu que venimos sufriendo n´Asturies dende cuantayá. Nun ye productu de la crisis actual. Respuende a les polítiques que gobernantes del país fixeron en toos estos años d´autionomía, dexando que´l nuestru sector industrial fora esmoronándose pasu ente pasu, la falta de defensa de los interes ganaderos na Unión Europea, el mal usu de los fondos mineros, ect, ect.

12. ¿ crees compatible la izquierda con el nacionalismu ?

» Por supuestu. Amás nel casu asturianu, al nun existir una burguesía en clave de país, les nuestres señes d´identidá quedaron en manes del pueblu trabayador. Precisamente eses señes, empezando pola llingua, foron estigmatizaes poles clases altes. Equí n´Asturies nun hai nenguna contradición en tener conciencia nacional y pensamientu d´izquierda.

13. ¿ qué significa Dixebra ?

» Si-y entrugues a un paisanu o muyer qu´use esta pallabra va dicite que ye la separación o la llende ente dos praos. Nel asturianu estándar emplégase como sinónimu de separación o independencia.

14. ¿ qué respondes cuando te llaman " radical " ?

» Yé un "sambenitu" col que la xente que somos críticos col sistema tenemos qu´aguantar. ¿Quién ye más radical nós coles nuestres lletres y plantegamientos ideolóxicos o un empresariu qu´echa a nun sé cuántos trabayadores, un gobiernu que reprime la llibertá d´esprersión, unes instituciones que marxinen la nuestra llingua...?

15. Xune, consideraríes a Fermín Muguruza y a Joe Strummer como referentes, tantu vitales como no musical? en que medida te sientes influenciáu por ellos? salú y dixebra

» Siempre lo nomo como dos de los mios referentes. Foron perimportantes na mio manera d´entender la música y na mio toma de conciencia social y política.

16. ¿ qué te presta más: Folk reivindicativu, Punk/ska/ reggae, Rock and Roll, hip hop o rap ?

» Nun hai porque renunciar a nada d´ello, toos son bonos pa comunicar. Yo escucho de too, nun soi nada prexuiciosu pa la música. Como se sueol dicir: na variedá tal gustu.

17. apoyas a Bloque por Asturies/ UNA, ¿ por qué ?

» Toi abondo desencantáu col movimientu políticu nacionalista en xeneral, hai demasiaes engarradielles, malos rollos, cainismu. Tenemos que superar esa fase, que yá lleva produciéndose dende va munchos años y avanzar hacia una organización política respetable y solvente. Pero tamién sopi consciente de que, como persona comprometida con unos ideales, tampoco puedo "escaqueame", nesi sen apoyo la opción que creo, si trabayen con xeitu, puen llegar a convertise nel referente que necesitamos los nacionaliegos d´izquierda.

18. ¿ te consideras un héroe de la clase trabajadora ?

» Pa nada. Esos héroes son los que trabayen por menos de mil euros, les que tienen un contratu por hores y echen la xornada entera y más, los que cada vez tienen menos derechos llaborales...

19. ¿ Qué ye ser asturianu pa tí ?

» Tou aquel o aquella que lo quiera ser, naciera o non equí. Conozo a munches persones que nacieron nel país y nun lo conocen pa nada, mentanto qu´otres que vinieron de fuera tienes respetu y querencia por Asturies.

20. Cuando Dixebra yá nun tea -oxalá sía dientro de muncho-... habrá un grupu suficientemente representativu pa ocupar esi furacu?

» Espero que sí. Ehí tán Skama la Rede, Sambre, Falanoncaduca, La Tarrancha, Misiva... y col tiempu tengo enfotu en que salgan dellos más.

21. hola xune!! que te parece la ocupacion del espacio de general elorza y la creacion del centro ssocial ocupado autogestionado la madreña?ves necesario mas acciones como esta en asturies?? 1 abrazo

» Yera daqué que se facía necesario n´Asturies, depués de la desaparición d´El Gaviluetu n´Avilés y La Reflexión en Xixón nun había nada paecío. Lo qu´hai que facer ye resistir y si lu esanicien dir a lliberar cualquier otru edifiuciu.

22. Xune, crees que l´asturianismu pue algamar dalgo n´estes elleuciones, o nun futuru? O crees que la xente ta desengañao cola politica? Munches gracies por responder a la mio entruga!

» Los nacionalistes d´izquierda asturianos tamos fartos de qu´una vuelta y otra se repita´l mesmu escenariu de fragmentación y enfrentamientu ente les organizaciones polítiques. El llabor d´éstes dende les últimes elecciones autonómiques foi practicamente inexistente, asina que lo que nun fixeron en toos estos meses nun lo van facer en cuatro díes. De toes maneres habrá que siguir apoyándoles hasta consiguir crear daqué estable, dinámico y representativo d´una parte de la sociedá asturiana.

23. Fai un añu´l DerrameRock colo de Pravia pa Ourense, otra vez que tornen a llevanos daqué nueso pa fuera. Como musicu asturianu, ¿fai falta un nueu festivalon del mesmu nivel pa siguir calteniendo a los nuesos grupos?

» Foi una verdadera pena que´l Derrame dexare Asturies. Agora quedamos ensin un alcuentru musical d´esi nivel, sí que fai falta un festival onde se combinen bandes de renome de fuera colos bonos grupos que tenemos n´Asturies.

24. Esti mensaxe nun ye denguna entregu.Ye sólo pa felicitate pol to trabayu como músicu y como personaxe representativu del movientu asturianu pola lliberación

» Munches gracies. Pero namás soi ún más de los y les militantes y activistes, yo escoyí´l campu de la música pero toos y toes somos importantes.

25. ¿Crees qu´otru camin ye posible na politica asturiana? ¿Una Xuntanza Nacionaliega? BA-UNA y CA refugaron dir xuntos nel 25M

» Tien qu´habelu porque sinón mal vamos. Vuelvo a repitir qu´hai qu´acabar colos personalismos, les zunes, los trapicheos y la mala fe nel nacionalismu d´izquierda asturianu. O eso o´l suicidiu políticu.

26. participaste nel festival liet de la canción en llingua minoritaria d´ Europa y quedasteis segundos, asina como en Lorient, ¿ qué se conoz d´Asturies fuera del Estáu español ?

» Cada vez va conociéndose más. Y nello influyeron abondo los grupos de música, que se convirtieron en verdaderos embaxadores de la nuestra llingua y cultura.

27. ¿ qué dirías a un ciudadano de Oviedo que detesta el bable y el nacionalismo abertzale de imitación ?

» Pues que la nuestra llingua merez tanta protección como Santa María del Narancu y qu´aquellos que la queremos emplegar tenemos que tener derechu, como él lo tien a usar el castellanu. En cuantes a lo del abertzalismu los nacionaliegos asturianos nun imitamos (na so gradísima mayoría) a naide, cenciellamente defendemos les nuestres idees y a esti país.

28. como resumes el pasu del tiempu en estos 25 años de dixebra? ye el mismu Xune que empezó? o podriamos decir que col pasu del tiempu y eses coses perdiose la gracia o la fuerza por la llucha?nun hay que olvidar que somos Indios.

» Yo sigo col mesmu puxu pero con canes. No esencial sigo pensando lo mesmo que cuando entamábemos, cambien les formes, les maneres, la manera d´actuar, pero la idea sigue ehí, viva.

29. ¿ qué te parez el teatru costumbrista asturianu ?

» Pues que nun momentu difícil pa la nuestra llingua foi un sofitu, que ye la nuestra "comedia" escénica y que lleva unos años evolucionando pa meyor.

30. ¿ porqué hay della xente que entá piensa que la " llingua por mí nomada" ye un inventu ?

» Por tola aculturación que carecimos los asturianos y asturianes na nuestra hestoria, fixéronnos creer que la llingua na que falábemos nun valía pa nada. Los procesos de normativización diéronse en bien de llingües del nuestru alredor y equí dellos personaxes esforzáronse n´esparder la falsa idea de que col asturianu nun se podía facer lo mesmo.

31. los videoclips de las cancion es estan cada vez m,as currados

» Eso débese al nuestru bon collaciu Guillermu Fernández, realizador d´ellos. La verdá que gracies a él meyoramos abondo nesi aspectu.

Munches gracies a toos y toes pola vuestra participación. Tamién pol vuestru apoyu y poles crítiques necesaries pa nun perder el norte. Vémonos nos conciertos. ¡Salú ya dixebra!